Karawang, Bewarajabar.com — Kabupaten Karawang salah sahiji kabupaten di Jawa Barat nu beunghar ku hasil bumi sarta beunghar ku budaya jeung wisata. Di sakuliah tatar Karawang sawah ngaplak ngahasilkeun gabah nu ngaleuya. Di beulah kaler aya laut nu ngahasilkeun lauk jeung sajabana katut basisir nu mangrupa tempat wisata nu teu bisa dianggap enteng. Beulah kidul, Gunung Sanggabuana jeung anak-anak gunungna, lian ti mibanda hasil bumi jeung kabeungharan sajarah oge mibanda tempat wisata nu teu saeutik.
Panalungtikan sajarah dumasar kapanggihna arkeologis di sawatara tempat di Karawang mangrupa bukti yen ti abad kadua wewengkon Karawang geus aya nu nyicingan tur ngagem budaya nu leuwih maju. Komplek Percandian Batujaya mangrupa salah sahiji bukti yen sabudeureun abad kaopat Karawang geus jadi puseur budaya. Seni arsitektur, seni pahat, seni tulis, jeung “fashion” geus sumebar di Karawang.
Sawatara titinggal sajarah nuduhkeun yen di jaman baheula di Karawang geus aya sawatara palabuan nu didatangan ku para padagang Cina, Portugis jeung padagang sejenna di nusantara. Geus ti beh ditu keneh memeh Karawang kaasup bagian ti Mataram sarta dijadikeun puseur logistik waktu nyerang ka Batavia, warga Karawang geus mikawanoh cara tatanen. Hal ieu dibuktikeun ku ayana huut dina campuran bata nu aya di Komplek Percandian Batujaya. Di Karawang tatar kidul oge kapanggih wewengkon sawah purba nu nepi ka kiwari digarap ku masarakat.
Kabeungharan budaya Karawang oge katiten dina basa nu digunakeun sapopoe ku masarakat Karawang. Aya tilu basa nu dipake ku masarakat Karawang, nyaeta, basa Sunda wewengkon Karawang, basa “Jawa” (basa Cirebon wewengkon Karawang) jeung basa Melayu Betawi wewengkon Karawang.
Basa Sunda wewengkon Karawang nyaeta basa nu umum dipake ku warga Karawang. Basa “Jawa” (basa Cirebon wewengkon Karawang) nyaeta basa nu dipake ku warga Karawang tatar kaler-wetan, utamana ku warga nu nganjrek di Kecamatan Cilamaya Wetan jeung sabudeureunna. Basa Melayu Betawi wewengkon Karawang nyaeta basa nu dipake ku warga Karawang tatar kaler-kulon, utamana ku warga nu nganjrek di Kecamatan Batujaya jeung sabudeureunna.
Ku kituna teu aneh lamun ayeuna Karawang mekar jadi puseur seni jeung budaya, leuit pare nasional sarta puseur industri panggedena di Indonesia. Karawang dina panggung sajarah nasional geus bukti yen cikal bakal sumanget kamerdekaan Negara Kesatuan Republik Indonesia disatujuan di Karawang. Ngibarkeun bandera Merah Putih nu mimiti tanggal 16 Agustus 1945 dilaksanakeun di Rengasdengklok Karawang, bumi pangkal perjuangan.
