Karawang, Bewarajabar.com — SDN Mulyasari I Kecamatan Ciampel, Karawang, ngayakeun kagiatan studi wisata di Kampung Turis Resort & Water Park nu lokasina di Kampung Parakanbadak Desa Mekarbuana Kecamatan Tegalwaru Karawang tatar kidul memeh pandemi corona.
Nurutkeun panitia studi wisata, tujuan ieu kagiatan lian ti “refreshing” sanggeus ngalaksaneun tugas di sakola pikeun para guru, oge mangrupa sarana hiburan jeung tempat mikawanoh lingkungan tur nambahan elmu pangaweruh pikeun para siswa.
“Alhamdulillah, para guru sareng para siswa ngaraos sugema ngalaksanakeun studi wisata di ieu tempat. Lokasina teu pati tebih ti sakola, mung butuh waktos perjalanan kandaraan kirang-langkung sajam,” ceuk panitia.
Kampung Turis nyaeta obyek wisata nu mangrupa penginapan, restoran jeung tempat pihnik. Di ieu lokasi wisatawan bisa nginep di vila, milih kadaharan sawatara menu kuliner jeung pihnik di sawatara wahana wisata.
Menu kuliner di Kampung Turis diantarana aya “Paket Kabayan” ngawengku: Nasi Putih, Gurame Asam Manis, Ikan Mas Goreng Kipas, Udang Tempura, Sate Ayam, Cah Kangkung Tauco, Capcay Kuah Sapi, Karedok, Tahu Tempe Tepung, Lalap Sambal, Teh Tawar.
“Paket Nyi Iteung” ngawengku: Nasi Putih, Gurame Saus Tiram, Sate Sapi, Ayam Bakar Kalasan, Soto Buntut, Udang Garing, Cah Tauge Ikan Asin, Capcay Kuah Seefood, Tahu Kipas, Sambal Goreng, Teh Tawar, jeung menu-menu sejenna.
Wahana Wisata ngawengku: Water Park, Perahu Bebek, Out Bond, Flying Fox, Sky Bike, Trampolin, Children Garden, Taman Tele Tubes, Taman Kelinci, Taman Satwa, Terapi Ikan, Fun Games, Lapangan Futsal, Pemancingan, jeung nu sejenna.
