Karawang, Bewarajabar.com — Judul di “cover” buku induk ditulis dina basa Walanda. Identitas tabel di jero buku induk ditulis dina basa Walanda jeung basa Indonesia. Data siswa jeung orang tua siswa ditulis ku hurup sambung nu rapih tur tembong ipis kandelna.
Ngaran siswa jeung kolotna lolobana ngaran Cina, nuduhkeun yen loba urang Cina nu nganjrek di ieu lembur. Pacabakan maranehna tatanen jeung dagang. “Pun nini ge sakola di dieu. Tah ieu datana,” ceuk Hj. Een Suhernah, salah saurang guru di ieu SD nu oge alumni ieu SD, di sagedengeun Kepala Sekolah, Amih, S.Pd. nalika ngobrol jeung Bewarajabar di kantor SDN Pisangsambo I Kecamatan Tirtajaya Karawang sawatara taun katukang.
Eta buku induk teh buku induk taun 30-han SDN Pisangsambo nu harita kaasup wilayah Kecamatan Batujaya memeh Pisangsambo kaasup wilayah Kecamatran Tirtajaya, pamekaran ti Batujaya. Nu sakola ka ieu SD aya oge nu ti daerah Bekasi peuntas Citarum. SDN Pisangsambo (nu ayeuna jadi SDN Pisangsambo I) diadegkeun taun 1912 jaman pamarentahan kolonial Walanda.
Aya saunit bangunan, 3 rohangan kelas, nu masih asli adegan jeung bahan-bahanna ti saprak dibangun, nyaeta mangrupa bangunan panggung bahanna kai jeung awi, lante panggung tina kai, dingding bilik tina awi. Ngan, boh lante boh dingding barolong, geus barobo. “Tos sababaraha kali aya siswa nu tiporos ka ieu lante,” ceuk Amih, S.Pd.
Nurutkeun Amih, Dinas Pariwisata dan Kebudayaan (Disparbud) Karawang geus nyindekkeun yen salah sahiji wangunan ieu SD mangrupa “cagar budaya” nu ulah dirobah adeganana. Tapi, nepi ka taun eta wangunan teh masih diantep, taya renovasi. “Mungguh pihawatireun sareng pibahayaeun kanggo barudak,” pokna.
