Bandung, – Tanggal 21 November nyaeta Harkannas (Hari Ikan Nasional) nu ditetepkeun dumasar Surat Keputusan Presiden Republik Indonesia No 3 Taun 2014 ngeunaan Hari Ikan Nasional atawa Harkannas ku Presiden Susilo Bambang Yudhoyono (SBY) dina tanggal 24 Januari 2014 nu kaliwat.
Mepeling Harkannas dilaksanakeun pikeun ngaronjatkeun kasadaran masarakat Indonesia kana pentingna lauk nu ngarupakeun bahan pangan nu wedel ku protein nu kualitasna kalintang luhurna sarta pikeun ngingetkeun yen Indonesia mibanda potensi perikanan nu perlu dimangfaatkeun sacara optimal nu tetep prinsipna ngamumule alam.
Tanggal 26 November 2020 nu kaliwat KKP (Kementerian Kelautan & Perikanan) dina ieu hal Direktorat Jenderal PDSPKP (Penguatan Daya Saing Produk Kelautan & Perikanan) ngayakeun acara mieling Harkannas nu ka 7 kalayan temana “Makan Ikan Tingkatkan Imunitas, Lawan Covid dan Stunting”. Acara nampilkeun dahar lauk sarta pameran virtual sektor kelautan jeung perikanan ti 34 Provinsi sakuliah Indonesia. Dina eta acara Provinsi Jawa Barat nampilkeun 28 produk unggulan kelautan jeung perikanan ti 15 UKM di Jawa Barat.
Acara diluuhan Ketua Umum Forikan (Forum Peningkatan Konsumsi Ikan) Jawa Barat Atalia Praratya Kamil, Plt. Kepala DKP (Dinas Kelautan & Perikanan) Provinsi Jawa Barat, H. Dede Sunendar, A.Pi.,M.P, Kepala Bidang Pembudidayaan Ikan Pengolahan & Pemasaran Hasil Perikanan DKP (Dinas Kelautan & Perikanan) Provinsi Jawa Barat, sarta perwakilan UKM ti Mamazy & Mitoha Frozen Food sarta KPincut Food.
Nurutkeun Atalia, ningkatkeun ngonsumsi lauk gede peranna dina Gerakan Peningkatan Gizi dina 1.000 HPK (Hari Pertama Kehidupan). Eta program bisa ngurangan pasualan balita stunting (gagal tumbuh) sarta kurang gizi.
“Mangpaat dahar lauk kalintang luar biasa, lantaran ku dahar lauk bisa ngurangan kasus stunting, kurang gizi, sarta panyakit regeneratif. Kuring katut rengrengan ti Forikan Jabar jeung DKP Jabar umajak pikeun ngahangketkeun gerakan dahar lauk,” ceuk Atalia.
Atalia nambahkeun, konsumsi lauk per kapita di Jawa Barat kudu ditingkatkeun. Dumasar data Dinas Kelautan & Perikanan Provinsi Jawa Barat, target konsumsi lauk Jawa Barat nyaeta 29,6 kilogram per kapita per taun. Sedengkeun, angka konsumsi masarakat Jawa Barat karek ngahontal 26 kg per kapita per taun atawa 82 gram sapoena.
