Bandung, bewarajabar.com — Gubernur Jawa Barat Ridwan Kamil meredih ka KPU (Komisi Pemilihan Umum) Provinsi Jabar nindak tandes Paslon (pasangan calon) Pilkada (Pemilihan Kepala Daerah) Serentak 2020, kaasup pendukungna, nu ngarumpak protokol kasehatan COVID-19 salila mangsa kampanye.
Ridwan Kamil ngajentrekeun, Pilkada serentak taun ieu dilaksanakeun dina mangsa pandemi ngabalukarkeun warga hariwang. Ku kituna, katandesan sakumna pihak, hususna KPU Jabar salaku penyelenggara, kalintang dibutuhkeun dina nanjeurkeun protokol kasehatan enggoning nyegah nepana COVID-19. “Salah sahiji nu diharepkeun ti KPU Jabar nyaeta katandesan, kudu ngajadikeun kapok mun seug aya nu ngarumpak aturan protokol kasehatan. KPU Jabar kudu ngarapetkeun barisan. Komunkasikeun deui aturan protokol kasehatan tong saukur himbauan, tapi kudu tandes,” pokna, sawaktu mere arahan ka rengrengan KPU Provinsi Jabar di Gedong Pakuan, Rebo (16/9/20).
[irp]
Anapon Pilkada serentak di Jabar rencanana bakal dilaksanakeun 9 Desember 2020 di dalapan daerah, nyaeta Kabupaten Bandung, Cianjur, Sukabumi, Karawang, Indramayu, Tasikmalaya, jeung Pangandaran, sarta Kota Depok. Masa kampanye dalapan kabupaten/kota di Jabar penggelar Pilkada Serentak 2020 dimimitian 26 September nepika 9 Desember 2020 atawa lumangsung salila 71 poe. Saluyu aturan, sakumna panitia penyelenggara wajib make APD (Alat Pelindung Diri) dina sakabeh rangkaian Pilkada serentak mimiti ti masa kampanye nepika waktu pencoblosan.
Ridwan Kamil nambahkeun, salian ti mastikeun logistik perlengkapan Pilkada, KPU Jabar kudu mastikeun sadiana logistik protokol kasehatan. Ku kituna, KPU kudu koordinasi jeung Gugus Tugas Percepatan Penanggulangan COVID-19 Jabar tumali pengadaan APD.
[irp]
Jeroning kitu, Ketua KPU Jabar Rifqi Ali Mubarok mastikeun yen sakumna rengrengan sarta panitia penyelenggara Pilkada Serentak 2020 geus ngalaksanakeun uji usap (swab test) metode Polymerase Chain Reaction (PCR) tur hasilna kabehanna negatif virus SARS-CoV-2 penyebab panyakit COVID-19.
Lain saukur penyelenggara, sakabeh Paslon di dalapan kabupaten/kota Jabar nu jumlahna 50 urang euweuh nu positif COVID-19. “Sakabeh panitia penyelenggara sehat euweuh nu katarajang COVID-19 ku tes swab, kaasup sakabeh Paslon negatif COVID-19,” ceuk Rifqi.
[irp]
Rifqi nambahkeun, tahapan Pilkada Serentak 2020 di Jabar lumangsung lancar, mimiti tina tahap persiapan nepika penyusunan Daftar Pemilih Sementara (DPS). Ti dalapan daerah nu ngalaksanakeun Pilkada serentak, 11,6 juta urang geus ditetepkeun jadi DPS. Sedengkeun TPS (Tempat Pemungutan Suara) totalna aya 33 rebu.
