Karawang, Bewarajabar.com — Rakit “ponton” tanaga mesin desel nu ngahubungkeun Kampung Narogtog Desa Tegallega Kecamatan Ciampel Kabupaten Karawang jeung Kampung Narogtog Desa Cilangkap Kecamatan Babakancikao Kabupaten Purwakarta, ngaliwatan walungan Citarum, mangrupa alat angkutan utama nu digunakeun ku warga, utamana warga Desa Tegallega.
Warga Desa Tegallega leuwih loba meuntas Citarum tumpak ieu rakit ngaliwatan wilayah Kecamatan Babakancikao, tibatan ngaliwatan wilayah Desa Mulyasejati, tatangga desana, lamun ngajugjug puseur kecamatan Ciampel di Desa Kutapohaci. Sabab, ngaliwat ka Desa Mulyasejati jalannna turun-nanjak, bulat-beulit tur loba nu rusak. Ari meuntas Citarum, tanjakanna teu pati loba sarta jalanna henteu tarahal.
Ku kituna, najan aya di wilayah Kabupaten Karawang, warga Desa Tegallega leuwih sering indit ka kota Purwakarta tibatan ka kota Karawang. Utamana nu sarakola, kaluar ti SD, warga Desa Tegallega neruskeun sakola ka SMP di Purwakarta. Bareto maranehna biasana neruskeun sakola ka SMPN 8 Purwakarta. Ayeuna maranehna lolobana neruskeun sakola ka SMPN 1 Babakancikao.
