Bandung, bewarajabar.com – Peran Kehumasan di Kementerian Agama teu bisa dianggap enteng, lantaran Humas ngarupakeun corong pikeun Kemenag sarta garda panghareupna dina ngabentuk citra. Kitu ditembrakkeun Kepala Bagian Tata Usaha Kanwil Kemenag Provinsi Jawa Barat, H.A. Handiman Romdony sawaktu muka Rapat Koordinasi Sub Bagian Informasi & Humas, di Aula Usisa Al Maula, Kanwil Kemenag Provinsi Jawa Barat, Salasa (09/05) nu kaliwat. Acara diluuhan para aparatur Kemenag sa Jawa Barat nu tugasna ngungkulan kahumasan.
Hadiman nandeskeun yen institusi Kemenag kudu mibanda citra nu hade di masarakat. Dina hal ngabentuk citra, Humas boga peran nu kalintang nangtukeunnana. Hade gorengna ditangtukeun ku Humas. Ku kituna, cara nitenan kana peran kahumasan kudu dirobah nu satadina ngan saukur ngalengkepan kudu jadi nu nangtukeun.
Tumali jeung pelayanan informasi, Hadiman ngajentrekeun, ngamangpaatkeun media informasi di lingkungan Kanwil Kemenag Jabar bakal dioptimalkeun. Website nu dipibanda ku Kanwil Kemenag Jabar lain saukur dimangpaatkeun jadi media informasi wungkul, tapi bakal dioptimalkeun jadi website pelayanan, nu ngentengkeun masarakat dina ngaakses pelayanan Kementerian Agama.
Jeroning kitu, Kasubbag Informasi & Humas Kanwil Kemenag Jabar, H. Holis Somantri, S.Ag.,M.Si nambahkeun, kiwari Kanwil Kemenag Jabar keur nyiapkeun website mandiri, nu kahareupna bakal disiapkeun jadi website informasi jeung pelayanan. Kuayana eta website diharepkeun bisa ngentengkeun masarakat nu hayang apal kamekaran proses pelayanan nu diajukeunnana cukup nitenan dina website.
RelatedPosts
“Masarakat cukup datang pikeun ngajukeun layanan terus balik deui ka imahna turta cukup nitenan prosesna nepika ahir dina website, saterusna balik deui ka Kanwil Kemenag Jabr pikeun nyokot hasil tina eta pelayanan,” tandes Holis. ( Dede Rivai )
