Di Mekarbuana Tegalwaru Ngabasmi Hama Make Berenuk

0
Buan berenuk atawa buah maja.

Bewarajabar.com — Buah berenuk sok dipake geuhgeuyan (pamoyokan) mun keur nyaritakeun bungbuahan. Buah nu wangunna buleud teh ukur dipake mengbal baheula mah. Sabab boro-boro ngeunah didahar, nu jelas pait rasana. Paling oge diarah kayuna jangeun suluh.

Tapi, kiwari buah berenuk keur “naik daun”. Buah berenuk dicampur jeung bahan sejenna bisa dipake ngabasmi hama pepelakan, cara nu dipraktekkeun di Sekolah Lapang Pengendalian Hama Terpadu (SLPHT) Desa Mekarbuana, Kec. Tegalwaru, Kab. Karawang sawatara taun katukang.

Nurutkeun salah saurang warga Desa Mekarbuana nu kungsi milu program SLPHT, nalika awal reformasi,  memeh taun 2000-an, Dinas Pertanian dan Tanaman Pangan (Diperta) Kab. Karawang, dina program  SLPHT di Mekarbuana, ngayakeun praktek nyieun  ramuan “racun tradisional” tina buah berebuk.

Bahanna: buah berenuk 5 siki, endog bebek (meri) 2 siki, kamper 10 siki, sabun colek 200 gram, minyak tanah sabotol cuka leutik, cai 20 leter. Carana: bahan-bahan dicampur sing aduk, tuluy “difermentasi” (direndem) salila 7-14 poe. Jadi weh ramuan “racun tradisional” pembasmi hama  tanaman nu murah meriah.

Ngagunakeunana: sagelas ramuan dicampur saleter cai, disemprotkeun kana pepelakan nu keuna ku hama, di antarana hama kungkang jeung hileud nu ngaruksak tangkal pare jeung nu sejenna.

Harita SLPHT dilaksanakeun unggal musim tanam pare salila 12 minggu (pertemuan/pelatihan saminggu sakali). Di Mekarbuana, pelatihan dilaksanakeun unggal poe Rebo. Siswana 25 urang, ngawengku aparat desa jeung tokoh masarakat. Siswa nu geus dilatih saterusna ngalatih para patani tur jadi nara sumber ngeunaan cara-raca ngabasmi hama.

Tinggalkan Balasan